Baldur Óskarsson fæddist í Hafnarfirði árið 1932. Að loknu miðskólaprófi á Skógum stundaði hann nám einn vetur við lýðháskóla í Svíþjóð. Því næst hélt hann til Katalóníu þar sem hann lærði listasögu og spænskar bókmenntir einn vetur við Universidad de Barcelona. Hann var blaðamaður á Tímanum 1957-64 og starfaði síðar sem fréttamaður hjá Ríkisútvarpinu. Hann var skólastjóri Myndlistarskóla Reykjavíkur 1965-73. Baldur hefur setið í stjórn Rithöfundafélags Íslands.

Ritferill hans spannar nú hálfa öld. Fyrsta verk hans var smásagnasafnið Hitabylgja sem kom út árið 1960. Þremur árum síðar kom út eftir hann skáldsagan Dagblað. Árið 1966 sendi hann frá sér sína fyrstu ljóðabók (Svefneyjar) og upp frá því hefur hann einkum einbeitt sér að ljóðagerð. Nú hafa komið út fjórtán ljóðabækur eftir hann, nú síðast Langtfrá öðrum grjótum (2010). 

Baldur hefur einnig fengist nokkuð við ljóðaþýðingar þar sem hann hefur einkum gert skáldinu Federico Garcia Lorca góð skil. Þá hefur Baldur skrifað talsvert um myndlist í bækur og tímarit, t.d. um myndlistarmanninn Jón Engilberts.

Baldur Óskarsson hlaut verðlaun úr rithöfundasjóði Ríkisútvarpsins árið 2011.

Sjá einnig Bókmenntavef Borgarbókasafns Reykjavíkur

Ritaskrá.