Nick Hornby fæddist árið 1957 og býr í norðurhluta Lundúna með konu sinni og syni. Hann hefur skrifað nokkrar bækur. Þekktastar eru: Fever Pitch (1992, kom út á íslensku 2000 undir heitinu Fótboltafár), High Fidelity (1995), About a Boy (1998, nú komin út í íslenskri þýðingu Eysteins Björnssonar undir heitinu Saga um strák), How to be Good (2001), og 31 Songs (2003). Nýjasta bók hans er skáldsagan A Long Way Down (2005).

Hann starfaði fyrst sem kennari en eftir að Fever Pitch kom út sneri hann sér að ritstörfum og er nú orðinn einn af þekktustu rithöfundum Englendinga. Nick Hornby heldur hinn breska húmor í heiðri og texti hans einkennist af vissu alvöruleysi og lítilli virðingu fyrir viðteknum „æðri“ gildum. En að baki léttleikanum leynist samt hlýr mannskilningur höfundar og einlæg virðing fyrir alvöru lífsins.

Auk bókaskrifanna fjallar Nick Hornby um dægurtónlist í bandaríska blaðinu New Yorker. Árið 1999 hlaut hann verðlaun kennd við E.M. Forster sem veitt eru af American Academy of Art and Letters.

Meira um Nick Hornby!