Skráð

Stefán Sturla og Flækjurof á Sauðárkróki

Sunnudaginn 12. júlí verður gaman á Grand-Inn á Sauðárkróki.

Þá ætlar Stefán Sturla að kynna nýjustu bók sína um Lísu lögreglukonu og hennar fólk, Flækjurof.

Hann spjallar um rannsóknarvinnuna og aðferðina við skrifin, persónurnar, fyrirmyndir og flækjur. Og svo les hann náttúrlega upp valda kafla!

Bókin er á sérstöku tilboðsverði þetta kvöld og höfundur áritar eintök með glöðu geði.

Tilvalið að koma í rauðvínsstemningu með rithöfundi.

Húsið verður opnað kl. 16:45 og Stefán tekur til máls kl. 17:00. Að sjálfsögðu er tilboð á rauðvínsglasi (eða hvítu).

Skráð

Ný rafbók

Nú er spennusagan Flækjurof komin í rafbókarbúning og salan farin af stað.

Skráð

Flækjurof kom út í síðustu viku!

Lokaþátturinn um Lísu og veröld hennar er kominn út.

Meira hér.

Skráð

Segðu mér: Stefán Sturla í spjalli við Sillu á Rás 1

Stefán Sturla

Í morgun átti Sigurlaug Margrét Jónasdóttir skemmtilegt samtal við Stefán Sturlu, höfund spennusögunnar FLÆKJUROF:

Hlustið hér.

Skráð

Bráðum kemur út ný spennusaga

Flækjurof er þriðji og síðasti hluti þríleiksins um lögreglukonuna Lísu og aðstoðarfólk hennar eftir Stefán Sturlu.

Fyrri bækur þríleiksins eru:

•   Fuglaskoðarinn (2017)

•   Fléttubönd (2018)

Neyðarkall berst úr dalnum endalausa. Björgunarsveitin er kölluð út, þyrlan er send af stað með Lísu og annað starfsfólk rannsóknarlögreglunnar. Hvað hefur gerst?

Lesendur fylgjast með óvæntum atburðum og margar spurningar vakna. Við sögu koma kunnuglegar persónur úr fyrri bókum þríleiksins: Lísa, Kári, Björn Bangsi, Sigrún og fleiri.

Fyrir utan leitina að skýringum á hinum óhugnanlegu atburðum sögunnar er ekki síður áhugaverður sá þráður sem snýst um Kára og líf hans í fortíð og nútíð.

Þið fáið meira að heyra þegar bókin kemur út.

Skráð

Bestu nýársóskir frá Ormstungu

Ormstunga sendir vinum, velunnurum og allri heimsbyggðinni bestu óskir um hamingjuríkt nýtt ár og ævarandi bókaflóð.

Skráð

Verk Guðmundar Steinssonar í Þjóðleikhúskjallaranum

Leiklestraveisla til heiðurs leikskáldinu Guðmundi Steinssyni verður í Þjóðleikhúskjallaranum á tímabilinu 26. október til 7. nóvember 2019.

Í tilefni af þessum ánægjulegu tíðindum fæst heildarsafn leikrita Guðmundar nú á lágu verði meðan birgðir endast. Smellið hér!

Verkið er tæplega 1400 blaðsíður í þremur bindum. Jón Viðar Jónsson ritar ítarlegan inngang.

DAGSKRÁ:

lau. 26. okt. kl. 16:00
Mælt fyrir minni skáldsins
– Umsjón: María Kristjánsdóttir og Þórunn Sigríður Þorgrímsdóttir

Viðfangsefni og þemu skáldsins kynnt með lestri víða úr lífsverkinu, m.a. úr Forsetaefninu sem var frumflutt í Þjóðleikhúsinu fyrir 55 árum, þann 21. október 1964.

sun. 27. okt. kl. 19:30 og þri. 29. okt kl. 19:30
Þjóðhátíð
leiklestur
– Leikstjóri: Sveinn Einarsson

fim. 31. okt kl. 19:30 og sun. 3. nóv kl. 16:00
Stundarfriður
leiklestur
– Leikstjóri: Benedikt Erlingsson

fim. 7. nóv. kl. 19:30 og sun. 10. nóv. kl. 16:00
Katthóll
leiklestur
– Leikstjóri: Stefán Baldursson

Leikritið Katthóll hefur aldrei verið flutt á sviði.

Skráð

Það er bókamarkaður úti í Örfirisey

Nú stendur yfir bókamarkaður Forlagsins á Fiskislóð 39. Hann er opinn alla daga til og með 2. október.

Ormstunga býður nokkra titla á kostakjörum:

  • Sauðfjárávarpið eftir Hákon J. Behrens @ 890 kr.
  • Síðasti elskhuginn eftir Val Gunnarsson @ 890 kr.
  • Endimörk heimsins eftir Sigurjón Magnússon (tilnefnd til Ísl. bókmenntaverðlaunanna 2012)  @ 790 kr.
  • Fuglaskoðarinn eftir Stefán Sturlu @ 490 kr.
  • Með skör járntjaldsins eftir Jón Björnsson @ 890 kr.
  • Blómin frá Maó eftir Hlín Agnarsdóttur @ 890 kr.
  • Dröfn og Hörgult eftir Baldur Óskarsson @ 490 kr.
  • Ekki láir við stein eftir Baldur Óskarsson @ 490 kr.
  • Bókaránið mikla eftir Korsgaard & Surrugue @ 490 kr.
  • Ljóðleg eftir Berglindi Gunnarsdóttur @ 490 kr.
Skráð

Bjuggust ekki við eftirköstum

Reykjavík, 23. febr. — OÓ.
ATÓMSPRENGJUÁRÁSIN, sem sett var á svið í Seli menntaskólanema í síðustu viku, hefur vakið mikla athygli. Eins og sagt var frá í Alþýðublaðinu í gær fór „skemmtunin“ þannig fram að spiluð var segulbandsspóla með tilbúnum fréttum á þann veg að atómsprengjuárás væri yfirvofandi á Keflavíkurflugvöll.

Svo vel tókst þessi flutningur, að margir nemendanna, sem ekki vissu að hér var um gabb að ræða, voru gripnir mikilli hræðslu og fengu grátköst og það jafnvel löngu eftir að sendingunni lauk og búið var að segja þeim að árásarfréttirnar væru tilbúningur einn.

Styrjöldin í Selinu (2019) bls. 118

Skráð

Jón á Bægisá kominn út

Sextánda tölublað hefur nú litið dagsins ljós. Hér er hægt að panta áskrift og hér má skoða þetta hefti sérstaklega eða kaupa í lausasölu. Nýjustu hefti fást líka í Bóksölu stúdenta.

Skráð

Alþjóðlegur dagur bókarinnar

Í dag , 23. apríl, er alþjóðlegur dagur bókarinnar.

Halldór Laxness fæddist á þessum dagi 1902, Shakespeare líka, nokkrum öldum áður. Og Cervantes lést á þessum degi árið 1616.

En í gær, 22. apríl, hefði Vladimir Nabokov haldið upp á afmælið sitt ef hann hefði lifað (fyrir misskilning héldu menn um tíma að hann hefði fæðst 23. apríl). Hann fæddist 1899 og dó 1977.

Enn eru fáein eintök eftir af frábærri þýðingu Illuga Jökulssonar á skáldsögu Nabokovs, Vörninni sem fæst nú á góðu verði.