Efni
Landfræðissaga Íslands er undirstöðurit um könnun landsins og er jafnframt vísinda- og rannsóknasaga Íslands frá örófi alda til loka 19. aldar auk þess að fjalla um ýmsa aðra þætti íslenskrar menningarsögu
Þetta bindi fjallar um ferðir og rannsóknir á 19. öld, allt fram undir 1880. Könnun landsins fær nú á sig vísindalegra snið og erlendir vísindamenn taka nú mjög að venja komur sínar til Íslands. Þorvaldur rekur nákvæmlega störf og rannsóknir Jónasar Hallgrímssonar og félaga hans, dönsku vísindamannanna Johans G. Forchhammer, Japetusar Steenstrup og J.C. Schythe, en af samskiptum hins síðastnefnda við landsmenn fóru misjafnar sögur.
Hinn merki þýski efnafræðingur Robert Bunsen kemur nokkuð við sögu, en hann mun fyrstur hafa skýrt eðli goshvera eins og Geysis.
Þorvaldur lætur sér ekki nægja að greina frá vísindaleiðöngrum útlendinga heldur segir einnig frá skemmtiferðum þeirra til landsins og þykir ekki jafnmikið til allra þeirra koma.
Margar myndir eru í þessari glæsilegu endurútgáfu einhvers merkasta fræðirits íslenskra bókmennta – og jafnframt eins hins skemmtilegasta.