Skáldsagan Lúx eftir Ágúst Guðmundsson
Spjallbókin Í belg og biðu eftir Svein Einarsson
ENGINN
SENDINGARKOSTNAÐUR
og bækurnar fást líka í bókabúðum
Þessar tvær passa vel í jólapakkann
Tag: skáldsögur
Gat ekki lagt frá sér Lúx fyrr en í sögulok
Við áttum saman notalega stund í Forlaginu úti á Granda miðvikudaginn 12. nóvember og fögnuðum útkomu nýrrar skáldsögu eftir Ágúst Guðmundsson, Lúx. Hann las upp úr bókinni og vakti ósvikna forvitni áheyrenda um framhaldið.
Einn gestanna lét hafa þetta eftir sér á fésbókinni í kjölfar útgáfuhófsins:
„Var að ljúka við Lúx sem er bráðskemmtileg, fyndin og spennandi. Það er gaman að láta segja sér sögu sem rennur svona vel. Ég sé hana alveg fyrir mér sem kvikmynd eins og til stóð í upphafi. Umhverfið, Reykjavík fyrir hrun, Lúxemborg og Kaupmannahöfn á velmegunartíma útrásarvíkinganna og blómaskeið ferðaþjónustunnar á Íslandi eftir Eyjafjallagos er afar sannfærandi. Að ég tali nú ekki um aðalpersónurnar, skáldmæltan norrænufræðing með málsháttablæti og eldkláran viðskiptafræðing konu hans. Ég gat ekki lagt Lúx frá mér fyrr en í sögulok.“
Ágúst átti stóran þátt í gerð bókarinnar Styrjöldin í Selinu sem greinir frá því þegar þriðja heimsstyrjöldin var sett á svið í ársbyrjun 1965. Fyrir tveimur árum kom út eftir hann skáldsagan Maður í eigin bíómynd þar sem Ingmar Bergman var í aðalhlutverki.
Þetta var skemmtileg og notaleg stund. Hér les höfundur upphaf sögunnar fyrir gesti.
Babúska komin út!
Í dag kom út nýja bókin hennar Hallveigar Thorlacius, Babúska
Við fögnum útgáfunni í Gunnarshúsi mánudaginn 3. júlí kl. 17:30. Hallveig segir okkur frá tildrögum að þessari fyrstu skáldsögu sem hún skrifar fyrir fullorðna lesendur.
Sigrún Valbergsdóttir leikstjóri og leiðsögumaður les valda kafla úr bókinni og Sigríður Thorlacius syngur sól í hjörtu viðstaddra.
Allir velkomnir meðan húsrúm leyfir.
Um söguna:
Ung stúlka verður fyrir bíl fyrir framan Þjóðleikhúsið og lætur lífið. Ökumaðurinn flýr af vettvangi. Eina vitnið að þessum atburði er Svetlana, rússneskur bókmenntafræðingur sem vinnur við þrif í opinberum byggingum. Hún hringir í neyðarnúmerið en hjólar burt. Lögreglukonan Fanney kemur á vettvang. Við rannsókn málsins ákveður hún vegna ágreinings við yfirmann sinn að snúa sér að öðru máli sem komið er upp á bernskuslóðum hennar í Urriðavík. Kona hefur fundist myrt úti í fjárhúsi og fleiri morð fylgja í kjölfarið. Böndin berast að Birtu sem hengdi sig úti í fjósi fyrir hundrað árum. Flestir hafa séð vofunni bregða fyrir og öll sveitin stendur á öndinni.
Austur í Síberíu fréttir Lena að dótturdóttir hennar hafi fundist dáin í Reykjavík. Hún sér sig knúna til að fara til Íslands. Þegar hún fréttir af innrás Rússa í Úkraínu segist hún ekki eiga neitt land. Nágranni Svetlönu, Pétur, býður henni að búa hjá sér þangað til djöfulskapnum linni.
Hvað eiga dauðsföllin í Reykjavík sameiginlegt með morðunum í Urriðavík? Lena tekur þátt í að greiða úr flækjunni.
